Om stillinga

Vil du vere med på å utvikle den digitale Ibsen-arven?

Ei treårig stilling som systemutviklar (senioringeniør SKO 1181 / overingeniør 1087) er ledig ved Senter for Ibsen-studium, eit dokumentasjons-, forskings- og undervisningssenter som er organisert under Institutt for lingvistiske og nordiske studium.

Senter for Ibsen-studium forvaltar eit stort og unikt digitalt materiale etter fleire tiår med Ibsen-relaterte forskings- og dokumentasjonsprosjekt. Vi har ei interaktiv e-utgåve av alt Ibsen skreiv i transkripsjonar og faksimiler (Henrik Ibsens skrifter), ein internasjonal relasjonell database med Ibsen-framføringar frå første oppføring og til i dag (IbsenStage), ein internasjonal bibliografi over Ibsen-relaterte publikasjonar (Ibsen-bibliografien), eit stort tekst- og bildearkiv, ein VR-teatermodell og ein fleirspråkleg database over Ibsen-omsettingar (The Multilingual Ibsen). Desse datasetta er av høg kvalitet og i aktiv bruk nasjonalt og internasjonalt, men er utvikla separat på ulike plattformer og foreløpig samla i Det virtuelle Ibsensenteret.

Vi ønsker å oppgradere og utvikle datasetta før 200-årsmarkeringa av Ibsens fødsel i 2028. Dette treårige prosjektet tar sikte på å oppgradere dei eksisterande plattformene etter FAIR-prinsippa for auka dataverdi og kartleggje nye tekniske moglegheiter for søk og interoperabilitet.

Systemutviklaren vil vere ein del av eit levande forskings- og undervisningsmiljø som er samansett av forskarar, masterstudentar og gjesteforskarar frå heile verda, som alle forskar på Ibsen frå ulike perspektiv, og der metodar frå digital humaniora blir brukt aktivt i både undervisning og forsking. Den som vert tilsett, vil bidra til å forme eit voksande fagmiljø ved UiO innanfor Digital Humaniora og delta i vidareutvikling av metodikk og kompetanse innanfor fagområdet.

Arbeidsoppgåver

• oppgradere eksisterande system
• samarbeide med andre utviklareiningar ved UiO om etablering og utvikling av databasar og lagringsløysingar
• planlegge søk og interoperabilitetsløysingar
• utforske nye teknologiske moglegheiter og utfordringar

Kvalifikasjonskrav

• mastergrad eller innlevert masteroppgåve innanfor relevante fagområde. Søkar må gjere greie for korleis graden er relevant for stillinga. Relevant erfaring kan kompensere for utdanningskravet.
• kompetanse på relevante tekstkodingsspråk og stilark (TEI XML, XSLT, HTML5, CSS)
• erfaring med cgi-skript og programmeringsspråka Perl, PHP, Python, json og Javascript
• erfaring med relevante rammeverk og databasar (Apache Cocoon, Zend, Oracle, eXist og SQL-databasar)
• erfaring med utvikling av REST-baserte API-ar
• flytande munnleg og skriftleg engelsk og norsk eller eit anna skandinavisk språk

Ønska kvalifikasjonskrav

• interesse for og forståing av humaniora og kulturelle datasett
• god kjennskap til omgrepsmodellar, metodikk og implementasjonsteknikkar for lenka data i kultursektoren
• erfaring med å jobbe i team
• erfaring med å løyse tekniske utfordringar

Personlege eigenskapar

• gode samarbeids- og kommunikasjonsevner, inkludert evna til å omsetje tekniske omgrep og uttrykk slik at det blir forståeleg for forskarar og studentar
• strukturert og arbeidsam
• tar initiativ til å tileigne seg ny kunnskap og nye ferdigheiter som er nødvendig for å kunne støtte den framifrå forskinga ved senteret
• løysingsorientert og tilpassingsdyktig

Vi tilbyr

• løn som senioringeniør SKO 1181 fastsetjast etter individuell vurdering innanfor eit spenn mellom kr 543 500 og kr 650 300, avhengig av kompetanse
• løn som overingeniør SKO 1087 fastsetjast etter individuell vurdering innanfor eit spenn mellom kr 534 400 og kr 583 500, avhengig av kompetanse
• eit hyggeleg og stimulerande arbeidsmiljø
• god pensjonsordning i Statens Pensjonskasse
• stilling i ei IA-verksemd, gode velferdsordningar og høve til trening i arbeidstida

Søknaden skal innehalde

• søknadsbrev
• CV
• kopi av vitnemål
• 2–3 referansar (namn, relasjon til søkar, e-postadresse og telefonnummer)

Søknad med vedlegg må sendast inn via vårt elektroniske rekrutteringssystem, klikk “Søk stillinga”.

Andre opplysningar

Aktuelle søkjarar vil bli kalla inn til intervju.

Etter offentleglova § 25 andre ledd kan opplysningar om søkaren bli offentleggjort sjølv om søkaren har bedt om ikkje å bli ført opp på søkarlista.

Vi viser òg til regelverk for teknisk-administrativt tilsette.

UiO har ein overtakingsavtale for alle tilsette med formål å sikre rettane til forskingsresultat m.m.

UiO har eit personalpolitisk mål om å oppnå ei balansert kjønnssamansetting og rekruttere personar med innvandrarbakgrunn.

I tillegg ønsker UiO at medarbeidarane i størst mogleg grad speglar mangfaldet i befolkninga. Vi oppfordrar derfor kvalifiserte søkarar med redusert funksjonsevne til å søke stillinga. Som IA-bedrift vil vi legge til rette for medarbeidarar med nedsett funksjonsevne.

IT-verksemda ved Universitetet i Oslo og ved Det humanistiske fakultet er for tida under omorganisering. Stillinga vil kunne få ei anna organisatorisk tilknyting.

Kontaktinformasjon

For spørsmål om stillinga: Senterleder Ellen Rees

For spørsmål om Det virtuelle Ibsensenteret: Datakurator Nina Marie Evensen

For spørsmål om søknadsprosessen: Personalrådgjevar Julie Bårdsen Tøllefsen

Søk stillinga