Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.

Universitetsbiblioteket (UB) yter tenester til forsking, undervisning, formidling og vitskapleg publisering ved Universitetet i Bergen. UB gjev studentar og vitskapleg tilsette tilgang til kunnskapskjelder, og gjev undervisning og rettleiing som har som mål å heve digital- og informasjonskompetansen. Vidare utviklar og driftar UB digital forskingsinfrastruktur, med særleg vekt på tenester som fremjar open vitskap. Les meir om UB her.

Kunnskap som formar samfunnet

UiB skal vere blant Europas fremste universitet, internasjonalt kjent for høg kvalitet i forsking og utdanning. Som samfunnsinstitusjon skal vi bidra til ei berekraftig og demokratisk utvikling og vere ein attraktiv og inkluderande studie- og arbeidsplass.

Om stillinga:

Ved Termportalen, Universitetsbiblioteket (UB) i Bergen, er det ledig ei fast stilling som terminolog (universitetsbibliotekar kode 1199 / førstebibliotekar kode 1200). Stillinga er i utgangspunktet tenkt som ei heiltidsstilling, men det kan vere mogeleg med lågare tilsetjingsprosent. Stillinga er for tida knytt til Språksamlingane ved Seksjon for spesialsamlingar. 

Språksamlingane er den nasjonale vitskaplege dokumentasjonsressursen for norsk språk og norske namn. Seksjon for spesialsamlingar forvaltar og formidlar kulturhistorisk viktige samlingar som fotografi, antikvariske bøker, manuskript og arkiv, avissamlingar og kart. Ei av samlingane står på UNESCO si verdsarvliste, og fleire andre er del av Noregs dokumentarv.

Språksamlingane har hatt ansvaret for Termportalen - den nasjonale infrastrukturen for norsk fagspråk og terminologi - sidan 2021. Ei sentral målsetjing er at norsk held fram som eit fullverdig bruksspråk på alle samfunnsområde. For å ivareta dette nasjonale ansvaret har UiB etablert eit eige fagmiljø som vidareutviklar og driftar Termportalen. 

Vi søkjer deg som har rett kompetanse, engasjement og motivasjon for å bidra til den vidare utviklinga av dette fagmiljøet. 

Arbeidsoppgåver og ansvar:

Som terminolog i Termportalen vert du del av eit aktivt språkfagleg og fleirfagleg miljø. Hovudoppgåvene dine vil vere å utvikle og vedlikehalde innhaldet i Termportalen i tett samarbeid med dei andre terminologane og fagmiljøet elles. Arbeidet inneber også dialog og samarbeid med eksterne fagmiljø, særleg innan universitets- og høgskulesektoren. 

Du må ha solide kunnskapar om språklege strukturar og språkbruk i kommunikasjon, framståande nynorskkunnskapar og evne til å samarbeide med fagfolk på mange ulike fagområde.

Om lag 20 % av stillinga er sett av til kommunikasjonsarbeid for Termportalen, i samarbeid med andre kollegaer. Arbeidet omfattar medansvar for synleggjering av Termportalen og norsk fagspråk gjennom medieoppslag og ekstern profilering, men også for intern kommunikasjonsfagleg rådgjeving. Dette inneber mellom anna:

• utarbeiding og publisering av fagleg innhald for ulike kanalar og nettsider
• planlegging, produksjon og publisering av video og bilete på digitale flater
• overvaking og analyse av fagleg relevante delar av mediebiletet

Ein mindre del av stillinga vil vere knytt til samarbeid med hovudterminologen om planlegging, synleggjering og praktisk gjennomføring av ulike faglege arrangement. Du vil få høve til breiare involvering i fagmiljøet ved å vere med på å forme faglege møteplassar. 

Det kan verte endringar i arbeidsoppgåvene som er knytte til stillinga, då det for tida vert gjennomført eit organisasjonsutviklingsprosjekt ved UB.

Kvalifikasjonar og eigenskapar:

Søkjar må: 

• Ha utdanning på masternivå innan språkfag. 
• Ha relevant praksis frå arbeid med språk eller kommunikasjon. Utanom terminologiarbeid kan slik praksis vere frå fagomsetjing, leksikografi, journalistikk eller anna kommunikasjonsarbeid.
• Ha god munnleg og skriftleg formuleringsevne på norsk og engelsk.
• Meistre begge dei norske skriftspråka svært godt.
• Kunne handtere fleire og ulike komplekse oppgåver samtidig. 
• Vere nøyaktig og strukturert, og kunne formidle fagleg komplekst stoff på ein god måte. 
• Kunne arbeide godt både individuelt og som del av eit tverrfagleg arbeidsfellesskap.
• Vere resultatorientert og kunne prioritere i tråd med strategiske føringar. 
• Ha gode samarbeidseigenskapar og vere ein lagspelar. 

Det er ein fordel om du også har 

• Kompetanse innan medieproduksjon og innhaldsstyring. 
• Kjennskap til digitale kommunikasjonsverktøy.
• Erfaring med planlegging og gjennomføring av arrangement og andre administrative aktivitetar. 

Personlege eigenskapar som er nødvendige for stillinga vil verte særleg vektlagde i vurderinga av søkjarane. 

Vi tilbyr:

• Eit godt og utfordrande fleirfagleg arbeidsmiljø.
• Engasjerte og kunnskapsrike kollegaer og arbeidsfellesskap. 
• Løn som universitetsbibliotekar (kode 1199) med ei brutto årsløn på mellom kr. 625 500 og kr. 650 000 i det statlege lønsregulativet, avhengig av kvalifikasjonar. Søkjarar som er erklært kompetente til stilling som førsteamanuensis eller førstebibliotekar ved ein institusjon som er godkjent av departementet eller har norsk doktorgrad eller utanlandsk doktorgrad godkjent som likeverdig med norsk, vert løna som førstebibliotekar (kode 1200), med ei brutto årsløn på mellom kr. 757 600 og kr. 780 000, avhengig av kvalifikasjonar. For særleg kvalifiserte søkjarar kan høgare løn vurderast. 
• Fleksibel arbeidstid.
• Medlemskap i Statens pensjonskasse.
• Gode velferdsordningar

Generell informasjon:

Utfyllande opplysningar om stillinga kan ein få ved å vende seg til seksjonsleiar Bjørn-Arvid Bagge, telefon +47 55 58 25 72, e-post: bjorn.bagge@uib.no, leiar for Språksamlingane, Peder Gammeltoft, telefon +47 55 58 21 95, e-post: peder.gammeltoft@uib.no, eller hovudterminolog i Termportalen, Tove Bjørneset, telefon +47 55 58 97 91, e-post: tove.bjorneset@uib.no.

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.

Vi oppmodar menn om å søkje. Dersom fleire søkjarar har tilnærma like kvalifikasjonar, gjeld reglane for moderat kjønnskvotering. 

Nærare om tilsettingsprosessen her.

Søk på stillingen