Universitetet i Stavanger (UiS) har omlag 12 000 studentar og 1.900 tilsette. Universitetet har store ambisjonar. Vi skal ha en innovativ og internasjonal profil og vera ei drivkraft i kunnskapsutviklinga og endringsprosessar i samfunnet. Vår felles retning skal drivast fram av omtanke for berekraftig omstilling og rettferdig samfunnsutvikling, gjennom nye måtar å forvalte naturressursane på og ved å legge til rette for betre byar og lokalsamfunn. Energi, helse og velferd, læring for livet er våre satsingsområde.
I samspel og dialog med våre omgjevnadar regionalt, nasjonalt og internasjonalt har vi eit ope og innovativt klima for utdanning, forsking, kunstnarisk utviklingsarbeid, nyskaping, formidling og museumsverksemd. Den faglege verksemda ved UiS er organisert i seks fakultet med 13 institutt og 2 nasjonale forskings- og kompetansesenter i tillegg til Arkeologisk museum. Vi er medlem i det europeiske nettverket for innovative universitet – European Consortium of Innovative Universities (ECIU). Universitetet ligg i den mest attraktive regionen i landet med 300.000 innbyggjarar. Stavangerregionen har et dynamisk arbeidsmarknad og tilbyr ei rekke spennande kultur- og fritidsaktivitetar.
Saman med dei tilsette og studentane våre vil vi løfta blikket, og våga å tenke stort og nytt - vi utfordre det velkjente og utforske det ukjente.
Fakultet for utdanningsvitskap og humaniora er den viktigaste institusjonen i regionen for utdanning av lærarer til barnehage, grunnskule, vidaregåande skule, høgskule og universitet. Fakultetet tilbyr også grunnutdanning innanfor språk, religion, historie, samt åtte masterprogram og to doktorgradsutdanningar. Fakultetet har ein nasjonal posisjon innanfor forsking og undervisning i lese- og skrivevanskar og åtferdsvanskar gjennom Nasjonalt senter for leseopplæring og leseforsking (Lesesenteret) og Nasjonalt senter for læringsmiljø og åtferdsforsking (Læringsmiljøsenteret). Fakultetet samarbeider med Utdanningsdirektoratet, kommunar og fylke om etter- og vidareutdanning. Totalt har fakultetet om lag 3.000 studentar og 320 tilsette fordelte på fakultetsadministrasjonen, Institutt for barnehagelærarutdanning, Institutt for grunnskulelærarutdanning, idrett og spesialpedagogikk, Institutt for kultur- og språkvitskap, Lesesenteret, Læringsmiljøsenteret og Kunnskapssenter for utdanning.
Institutt for kultur- og språkvitskap har ansvar for lektorutdanning for trinn 8-13 og praktisk-pedagogisk utdanning (PPU). Instituttet tilbyr óg utdanningar innanfor nordisk, engelsk, religion, historie, norsk for internasjonale studentar i tillegg til mastergradsutdanningar i historiedidaktikk, lesevitskap og Literacy Studies. I samarbeid med andre einingar ved fakultetet tilbyr instituttet doktorgradsutdanning i utdanningsvitskap og humaniora. Det er i dag 80 tilsette og 1100 studentar ved instituttet.
Om stillinga
Universitetet i Stavanger har ledig stilling som stipendiat i språkvitskap ved Fakultet for utdanningsvitskap og humaniora, Institutt for kultur- og språkvitskap. Stillinga er ledig frå 01.08.2025.
Dette er ei utdanningsstilling som i hovudsak skal gi lovande forskarar høve til fagleg utvikling gjennom ei forskarutdanning. Den som blir tilsett vil bli tatt opp på ph.d.-programmet i utdanningsvitskap og humaniora. Programmet omfattar relevante kurs i eit omfang som svarer til omkring eit halvt års studium, ei avhandling basert på sjølvstendig forsking, deltaking i nasjonale og internasjonale forskarmiljø, relevant fagleg formidling, prøveforelesing og disputas. Les meir om forskarutdanninga ved UiS på nettsidene våre.
Stipendiaten vert tilsett for ein periode på tre år med rein forskarutdanning.
Stillinga er eksternt finansiert med middel frå Noregs forskingsråd, prosjekt nummer 354301.
Forskingstema
Den som vert tilsett vil vera knytt til forskingsprosjektet North American Norwegian Tonal Accents in Contact (NANTiC) og forskargruppa Fleirspråkleg utvikling og endring i nyare tid (FLUENT).
Prosjektet North American Norwegian Tonal Accents in Contact handlar om prosodien, dvs. den suprasegmentale fonologien, og tilhøvet mellom fonologi og morfologi i norsk som arvespråk i USA. Eit arvespråk er eit språk som er tileigna i heimen og/eller lokalmiljøet, men som ikkje er majoritetsspråket i det større, nasjonale språksamfunnet. Prosjektet undersøkjer tonelag hjå den amerikanske diasporaen av norsktalarar som har vore i kontakt med engelsk i over hundre år. Difor har prosjektet to hovudmålsetjingar. Den eine er å utforska konsekvensane engelsk-norsk språkkontakt har hatt for nordamerikanorsk tonelag og tilknytte språkstrukturar. Den andre er å utvida forsking på tilhøvet mellom morfologiske prosessar og fonologi, særleg i arvespråk og språka som dei er i kontakt med.
Ph.d.-prosjektet må vera innanfor fonologi, morfologi eller morfofonologi, og dessutan knyta seg til ei av eller båe hovudmålsetjingane. Søkjarar må leggja fram eit prosjekt og levera ei prosjektskisse.
Prosjektskisse
Som søkjar må du levera ei førebels prosjektskisse for eit doktorgradsprosjekt innanfor fagområdet, der det vert gjort greie for problemstilling, relevans, teoretisk og metodisk tilnærming. Den førebelse prosjektskissa vil inngå i kompetansevurderinga. I laupet av dei tre første månadene av tilsettingsperioden vil prosjektskissa og framdriftsplan bli utvikla vidare i samarbeid med rettleiarane og utforma til den endelege planen for ph.d.-prosjektet. Mal for prosjektskisse finn du her.
Kvalifikasjonskrav
Vi søker deg som har ein sterk fagleg bakgrunn med mastergrad innanfor teoretisk/ålmenn språkvitskap, nordisk språkvitskap, engelsk språkvitskap eller liknande, eller har tilsvarande utdanning som gir grunnlag for å gjennomføra ei forskarutdanning, fortrinnsvis av nyare dato.Dersom karakteren din på masteroppgåva og vekta gjennomsnittskarakter på masterstudiet begge kvar for seg svarer til B eller betre, er du den me søkjer etter. Avsluttar du utdanninga di våren 2025, er du òg velkomen til å søkja.
Dersom du har ei utdanning frå ein institusjon med annan karakterskala enn A-F, og/eller med andre typar studiepoeng enn sp/ECT, må du leggja ved ein stadfesta konverteringsskala som viser korleis karakterane kan samanliknast med den norske A-F skalaen og eit Diploma Supplement eller liknande som forklarer omfanget av emna/faga som inngår i utdanninga Du kan bruka desse konverteringsskalaene til å berekna poenga dine for oppta
Vidare vert det lagt vekt på at du:
har gode ferdigheiter i eit skandinavisk språk (norsk, svensk eller dansk), både skriftleg og munnleg
tidlegare erfaring med forsking på språk, inkludert arvespråk
er motivert, og har potensial for forsking innanfor fagfeltet
har faglege og personlege føresetnader for å gjennomføra doktorgradsutdanninga innan tilsettingsperioden
kan arbeida sjølvstendig og i eit fellesskap, vera nytenkande og kreativ
er strukturert og har stor arbeidskapasitet
har gode ferdigheiter i engelsk, både skriftleg og munnleg.
Krav til kompetanse i engelsk
Gode evner i engelsk er naudsynte for å delta i doktorgradsprogrammet. Internasjonale søkjarar må dokumentera at dei har gjennomført ein av følgjande testar med oppgitt resultat eller betre:
TOEFL – Test of English as a Foreign Language, Internet-Based Test (IBT). Minimum resultat: 90
IELTS – International English Language Testing Service. Minimum resultat: 6.5
Certificate in Advanced English (CAE) og Certificate of Proficiency in English (CPE) frå Universitetet i Cambridge
PTE Academic – Pearson Test of English Academic. Minimum resultat: 62
Følgjande søkjarar er fritatt frå krava:
søkjarar med eit års fullført universitetsstudium i Australia, Canada, Irland, New Zealand, Storbritannia, USA
søkjarar med International Baccalaureate (IB) diplom
søkjarar med fullført bachelor- og/eller mastergrad med engelsk som undervisningsspråk i et EU-/EØS-land
Vi tilbyr
forskarutdanning i varierte arbeidsoppgåver i ein stor organisasjon med eit viktig samfunnsoppdrag
eit ambisiøst arbeidsfellesskap og eit inkluderande arbeidsmiljø
lønn etter Statens lønnsregulativ l.pl 17.515, kode 1017, kr 575.400 bto per år med lønnsutvikling etter ansiennitet i stillinga
Mangfald er ein ressurs i arbeids- og læringsmiljøet ved UiS. Når vi har ulike bakgrunnar og erfaringar, kan vi sjå utfordringar frå fleire vinklar og finne betre løysingar.
På UiS er vi opptatt av å vise respekt for kvarandre med dei ulikskapane vi har, og vi legg til rette for tilsette med nedsett funksjonsevne. Vi tek omsyn til behova dine og situasjonen din i ulike livsfasar.
Om du synest stillinga er interessant, oppmodar vi deg til å søkje, uavhengig av kjønn, funksjonsevne, kulturell bakgrunn eller om du har vore utanfor arbeidslivet ei tid.
Er det kvalifiserte søkjarar med funksjonsnedsetjing, hol i CV-en eller innvandrarbakgrunn, inviterer me minst inn éin søkjar i kvar av desse gruppene til intervju. Kjenne du deg igjen i ein av desse kategoriane, kan du kryssa av i jobbsøkjarportalen vår.
Les meir om krava for å bli vurdert som søkjar i desse gruppene her.
Kontaktinformasjon
Spørsmål om stillinga og forskingsprosjektet kan rettast til David A. Natvig, tlf: 51831573, e-post: david.a.natvig@uis.no.
Opplysningar om tilsetjingsprosessen kan rettast til HR-rådgivar Camelia.danaei, tlf: 51 83 31 49, e-post: camelia.danaei@uis.no.
Søknad
Søk stillinga elektronisk via "Søk stillinga" på denne sida. Her ber me deg om å registrera minimum søknadsbrev, relevant utdanning, arbeidserfaring og språkevner. I søknadsbrevet må du få fram forskingsinteressane og motivasjonen din for stillinga.
Følgjande blir lasta opp som vedlegg til søknaden:
CV med fullstendig oversikt over utdanning og erfaring
vitnemål og attestar
dokumentasjon på annan aktivitet som du vurderer som relevant
Diploma Supplement eller liknande og konverteringsskala dersom dette er påkravd
publikasjonar eller anna relevant forskingsarbeid
Søknaden vil bli vurdert ut frå informasjonen som er tilgjengeleg i Jobbnorge ved søknadsfristen. Sørg derfor for at søknaden tydeleg viser korleis evnene og erfaringane dine oppfyller kriteria som det er skrive om over og at du har lagt ved naudsynt dokumentasjon.
Dokumentasjonen må finnast på eit skandinavisk språk eller engelsk. Dersom vedlegga overskrid 30 MB til saman, må dei komprimerast før opplasting.
Me gjer merksame på at opplysningar om søkjar kan bli offentleggjorde sjølv om søkjar har bedd om ikkje å bli oppført på offentleg søkjarliste, jf offentleglova § 25. Dersom oppfordringa di ikkje blir tatt til følge, vil du bli varsla om dette.
UiS vurderer berre søknadar og vedlegg registrert i Jobbnorge.
Generell informasjon
Tilsetjinga blir gjennomført etter prinsippa i statstilsettelova, og lovverk som regulerer eksport av kunnskap, teknologi og tenester.
Tilsetjing som stipendiat er regulert i Forskrift om tilsetjingsvilkår for stillingar som postdoktor, stipendiat, vitskapleg assistent dessutan spesialistkandidat.
Kompetansen din for stillinga, ut frå utdanning og prosjektskisse registrert i Jobbnorge, vil bli vurdert av ein intern komité. På bakgrunn av fråsegna frå komiteen vil aktuelle søkjarar bli inviterte til intervju. Det vil òg bli innhenta referansar for aktuelle kandidatar. Meir om tilsetjingsprosessen på nettsidene våre.
Studiet vert i hovudsak gjennomført ved Universitetet i Stavanger, med unntak av eit avtalt opphald i utlandet ved eit anerkjent, relevant forskingsmiljø.
Det er ein føresetnad at den som vert tilsett buset seg slik at vedkommande kan vera til stades ved, og tilgjengeleg for fagmiljøet på arbeidsplassen i ordinær arbeidstid.
Stillinga er kunngjort på både norsk og engelsk. Ved meiningsforskjell mellom tekstane skal den norske teksten leggjast til grunn.
