Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.
Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.
Vil du vere med å forme framtida?
Seniorkonsulent
Ved Geofysisk institutt er det ledig ei fast stilling som seniorkonsulent (studiekonsulent).
Vi søkjer ein nysgjerrig og driftig medarbeider til ei stilling med ansvar for administrasjon av Masterprogram i meteorologi og oseanografi og forskarutdanninga (ph.d.) ved instituttet.
Geofysisk institutt er sentralt i universitetet sine satsingsområde klima og energiomstilling, og driv undervisning og forsking innan meteorologi, klima, fysisk og kjemisk oseanografi og fornybar energi. Instituttet har bachelor- og masterprogram i meteorologi og oseanografi, og har det administrative ansvaret for masterprogramma i energi. Forskarutdanninga er ein stor og viktig del av utdanningsaktiviteten ved instituttet. Geofysisk institutt har óg koordineringsansvar for nasjonal forskarskule i klimadynamikk. For nærare informasjon om instituttet, sjå www.uib.no/gfi.
Instituttadministrasjonen har 11 tilsette som yter administrativ støtte til fagmiljøa innan områda personal- og økonomiforvaltning, informasjonstenester, studieadministrasjon, forskarutdanning og forskingskoordinering og forskingsadministrasjon. Administrasjonen si målsetjing er å leggje forholda best mogleg til rette slik at dei vitskapleg tilsette kan drive forsking, utdanning og formidling av høg kvalitet.
Arbeidsoppgåver:
Den tilsette vil få varierte arbeidsoppgåver innan studieadministrasjon, med utgangspunkt i admninistrativ koordinering av masterprogram og forskarutdanninga ved instituttet.
Døme på oppgåver er:
Sakshandsaming- og utgreiingsoppgåver
Sekretær for programstyret og forskarutdanningsutvalet
Koordinering, kvalitetssikring og utvikling av Masterprogram i meteorologi og oseanografi og ph.d.-utdanninga ved instituttet.
Studentopptak og - mottak
Studierettleiing, informasjonsverksemd og rekruttering.
Medverknad i undervisningsplanlegging og tilrettelegging av undervisning.
Eksamensarbeid knytt til fullføring av grad
Disputasadministrasjon
Arbeid med nettsider
Spesialistoppgåver knytt til internasjonal mobilitet og innpassing av norsk og utanlandsk utdanning
Som tilsett i administrasjonen må du og kunne ta del i andre oppgåver om naudsynt. Studiekonsulenten skal rapportere til administrasjonssjefen som er næraste overordna.
Kvalifikasjonar og eigenskapar:
Høgare utdanning på masternivå, eller tilsvarande utdanning. Vidare vil følgjande kvalifikasjonar kunne vere ei føremon: Utdanning innan realfag, gjerne med bakgrunn frå meteorologi, oseanografi, matematikk, fysikk.
Kjennskap til og erfaring frå universitets- og høgskolesektoren eller offentleg forvalting er ein føremon.
Relevant praksis er ein føremon (men nyutdanna kan òg søkje)
God administrativ IT-kompetanse er ein føremon.
Kjennskap til/erfaring med Felles Studentsystem (FS), sakshandsaming- og arkivsystem, og UiB sine elektroniske portalar er ein føremon.
Språk
God skriftleg framstillingsevne på båe målføre i tillegg til engelsk skriftleg og munnleg.
Personlege eigenskapar
Evne til å arbeide sjølvstendig og vere ansvarsmedviten
Initiativrik, motivert og ha stor arbeidskapasitet
Resultat- og løysingsorientert
Serviceinnstilt
Gode kommunikasjons- og samarbeidsevner
Gode analytiske eigenskapar og nødvendig presisjon i arbeidet
Vi kan tilby:
Eit godt og fagleg utfordrande arbeidsmiljø
Stilling som seniorkonsulent (kode 1363) i lønssteg 53 - 57 (for tida kr 472000 - 504 700) i det statlege lønsregulativet.
Utfyllande opplysningar om stillinga kan ein få ved å vende seg til:
Administrasjonssjef Kristin Kalvik, kristin.kalvik@uib.no, telefon 55582601
Den statlege arbeidsstyrken skal i størst mogleg grad spegle mangfaldet i befolkninga. Det er eit personalpolitisk mål å få ei balansert alders- og kjønnssamansetning. Personar med innvandrarbakgrunn og personar med nedsett funksjonsevne blir oppmoda om å søkje stillinga.
Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.
Det gjennomførast forsøk med anonyme søknadar i staten. Anonymiseringa av søknadar skal gjelde den fyrste utsilingsfasen av aktuelle kandidatar som er aktuelle for intervju. Forsøket vil bli evaluert av Difi, som behandlar anonyme opplysningar om tilsetjingsprosessen, og det blir utarbeida ein statistikk over resultatet av forsøket. Opplysningar om enkeltpersonar vil ikkje bli utlevert til andre i samband med forsøket og evalueringa, men reglene om innsyn i offentleg søkjarliste og utvida søkjarliste gjeld.