Ved Senter for kvinne og kjønnsforsking (SKOK) er det ledig ei stilling som stipendiat i prosjektet “Securing the future: Resilient cities in the context of migration”. Stillinga er for ein åremålsperiode på fire år, finansiert av UiB sitt sentrale satsingsområde “Globale samfunnsutfordringar”.

Om prosjektet/arbeidsoppgåver:

Som del av UiB si satsing på globale samfunnsutfordringar er Senter for kvinne- og kjønnsforsking (SKOK), i samarbeid med Institutt for sosialantropologi (Sos.ant.), tildelt ph.d.-prosjektet “Securing the future: Resilient cities in the context of migration”. Med empirisk søkelys på transnasjonale møteplassar eller nettverk der urbane tryggleiksutfordringar vert forma og erfaringar delt, skal ph.d.-prosjektet utforske den semantiske produksjonen av urbane tryggleiksproblematikkar på dette styringspolitiske feltet.

Målet med ph.d.-prosjektet er å få betre innsikt i korleis resiliens-orienterte tryggleiksstrategiar set rammene for og formar globale utfordringar tilknytt migrasjon. Ei grunnleggande antaking er at resiliens-orienterte tryggleiksstrategiar inneber spesifikke framtidsskapande praksisar i notida, som leier til nye kjønna og rasialiserte utfordringar så vel som mogleheiter. Dei overordna forskingsspørsmåla er: Korleis vert nye urbane tryggleiksstrategiar forma på grunnlag av spesifikke idear om den usikre framtida, slik desse vert spreidd gjennom internasjonale, tverr-sektorielle nettverk og møteplassar retta mot forskarar, myndigheiter, organisasjonar og kommersielle aktørar? Korleis påverkar ein resiliens-orientering til urban tryggleik måten rasialiserte og kjønna sosiale skiljeliner – inkludert ulikheter i fordelinga av urbane ressursar – vert problematisert på?

Kandidaten skal utforme eit sjølvstendig ph.d.-prosjekt innanfor rammene for den overordna prosjektskissa. Ph.d.-prosjektet skal gjennomførast i samarbeid med hovudrettleiar, professor Randi Gressgård (SKOK), og birettleiar, professor Bjørn Enge Bertelsen (Sos.ant.). Potensielle søkarar vert oppmoda til å kontakte Gressgård for meir informasjon om ramma for prosjektet.

Kvalifikasjonar og eigenskapar

• Søkjarar må ha oppnådd mastergrad eller tilsvarande innan kjønnsstudium, urbane studium, arkitektstudium, migrasjonsstudium eller andre relevante fagfelt eller ha levert masteroppgåva til vurdering innan søknadsfristen er ute. Det er ein føresetnad at mastergraden er oppnådd før tilsetjing kan skje. Søkjarar som ikkje har norsk mastergrad, blir vurderte etter krav frå Nasjonalt organ for kvalitet i utdanninga (NOKUT). Senteret vil kunne sende dokumentasjon av utanlandsk utdanning til NOKUT for å vurdere om utdanningsgrunnlaget er likeverdig med norsk mastergrad.
• Arbeide sjølvstendig og strukturert og ha gode samarbeidsevner.
• Erfaring frå byplanlegging og -arkitektur eller anna arbeid relatert til urban tryggleiksutforming samt relevante publikasjonar og formidlingsarbeid vil vektleggast.
• God skriftleg og munnleg framstillingsevne på engelsk
• Må kunne nytte eit skandinavisk språk

Særlege krav for stillinga

Søkaren må vise innsikt i forsking på resiliens-orientert urban sikkerhet knytt til migrasjon og ha eit integrert kjønnsperspektiv i prosjektskissa, i tråd med den overordna ramma for prosjektet. Ph.d.-prosjektet krev spesiell kompetanse på materiell urban kultur, som arkitektur, samt urbane tryggleikssystem, som nyare tryggleiksteknologiar. Det vil også vektleggast at søkaren har erfaring frå praksisfelt relevant for forskingsprosjektet, inkludert undervisningserfaring frå universitet eller høgskule.

Om senteret

Senter for kvinne- og kjønnsforsking er eit tverrfagleg senter for forsking, formidling og undervisning om kjønn, seksualitet og feministisk teori. Senteret har ein kritisk, historisk og global profil, med fokus på samspelet mellom kjønn og andre maktstrukturar i samfunnet, som rase, klasse og etnisitet. SKOK er eit forskingsmiljø med spisskompetanse på teori innanfor det tverrfaglege kjønnsforskingsfeltet. Den som vert tilsett skal bidra i den vidare oppbygginga av kompetansen i forskingsmiljøet.

SKOK er ein pådrivar for kjønnsforsking ved UiB, samt ein aktiv aktør innan kjønnsforsking nasjonalt og internasjonalt. Stipendiaten ventast å delta både på nasjonale og internasjonale arenaer, og det er ønskeleg at kandidaten siktar seg inn mot publisering både i nasjonale og internasjonale publiseringskanalar. SKOK har samarbeidsavtaler mellom anna med Barnard College på Columbia University, Duke University og University of Cape Town, og det vil være høve for opphald ved eit av desse universiteta.

Det er ein føresetnad at den som vert tilsett busett seg slik at han eller ho kan ha kontorplass og delta i den daglege verksemda ved SKOK.

Om stipendiatstillinga:

Samla stipendperiode er fire år, der 25 % av tida er pliktarbeid, knytt til forsking, undervisning og formidling. Dersom kandidaten tidlegare har vore tilsett i rekrutteringsstilling, kan det bli gjort frådrag i tilsetjingsperioden.

Om forskarutdanninga:

Som stipendiat skal kandidaten delta i eit godkjent utdanningsprogram for ein ph.d.- grad innanfor ei tidsramme på tre år. Det er ein føresetnad at kandidaten fyller krava for opptak til forskarutdanninga ved Universitetet i Bergen.

Vi kan tilby:

• Eit godt og fagleg utfordrande arbeidsmiljø
• Løn etter lønssteg 51 (kode 1017 /LR20, alternativ 9) i det statlege lønnsregulativet. Dette utgjer ei årsløn på kr 449 000 brutto
• Medlemskap i Statens pensjonskasse
• Stilling i ei inkluderande arbeidslivsverksemd (IA-verksemd)
• Gode velferdsordningar

Slik søkjer du stillinga

Søknaden skal sendast elektronisk innan oppgitt frist via link på denne sida «SØK STILLINGEN».

Søknaden skal innehalde:

• Søknadsbrev
• Prosjektskisse (maksimum 4000 ord)
• Framdriftsplan
• Litteraturliste til prosjektskildringa
• Namn og kontaktopplysningar til to referansepersonar, ein av desse må vere hovudrettleiaren frå masteroppgåva eller tilsvarande oppgåve.
• CV
• Karakterutskrifter og vitnemål for bachelor- og mastergrad, alternativt ei stadfesting av at mastergradsoppgåva er levert
• Relevante attestar
• Eventuell liste over vitskaplege arbeid (publikasjonsliste)
• Eventuelle publikasjonar

Søknad og vedlegg med attesterte omsetjingar til engelsk eller eit skandinavisk språk må lastast opp i JobbNorge.

Generell informasjon:

Utfyllande opplysningar om stillinga kan ein få ved å vende seg til:

• Professor Randi Gressgård, SKOK, 55 58 89 98, randi.gressgard@uib.no.

Den statlege arbeidsstyrken skal i størst mogleg grad spegle mangfaldet i befolkninga. Det er eit personalpolitisk mål å få ei balansert alders- og kjønnssamansetning. Personar med innvandrarbakgrunn og personar med nedsett funksjonsevne blir oppmoda om å søkje stillinga.

Universitetet i Bergen nyttar meirinnsyn ved tilsetjing i vitskaplege stillingar.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Nærare om tilsettingsprosessen her.

Søknadsfrist: 12.10.2018

Søknaden skal merkjast: 18/10468

SØK STILLINGEN