Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.
UiB skal vere blant Europas fremste universitet, internasjonalt kjent for høg kvalitet i forsking og utdanning. Som samfunnsinstitusjon skal vi bidra til ei berekraftig og demokratisk utvikling og vere ein attraktiv og inkluderande studie- og arbeidsplass.
Stipendiatstillinga er knytt til forskingsprosjektet «Analysing violent variations in ancient Jewish narrative» (AViVa), finansiert av Noregs forskingsråd, som skal analysere dei formidla valdsnormene i skildringar av krigføring og organisert konflikt i antikk jødisk litteratur (ca. 500 f.Kr. – 300 e.Kr.). AViVa sitt hovudmål er å undersøkje variasjonar i valdsepisodar gjennom konfliktløpet, og å spore korleis overdriven eller normbrytande vald blei skildra i jødiske beretningar om antikke krigar med omfattande jødisk deltaking.
Stipendiatstillinga er knytt til AViVa si arbeidspakke om vald og identitet i bibelske, antikke jødiske og/eller relaterte tekstar, og undersøkjer korleis dei som set i gang eller beordrar overdriven vald blir karakteriserte. Vi ønskjer prosjekt som søkjer svar på korleis førestillingar om vald samverkar med element av identitetsskaping, og korleis valdsnarrativ påverkar identitetsformulering. Forskingsprosjekt som undersøkjer karakterprofilar, gruppeklassifisering og stereotypisering i narrativ om langvarige konfliktar er også velkomne. Prosjekta er forventa å omfatte narrativ analyse av kjeldene som er identifiserte for forskinga.
Det er forventa at ph.d.-kandidaten formulerer og gjennomfører ei uavhengig studie innanfor dette temaet.
Om stipendiatstillinga og forskarutdanninga:
Stipendiatstillinga har som hovudmål å leie fram til ein ph.d.-grad, som kvalifiserer for sjølvstendig forskingsverksemd og for anna arbeid som krev særskild kompetanse.
Samla stipendperiode er tre år, der 2,5 år er sett av til arbeid med sjølve doktorgradsprosjektet. Som stipendiat blir du tatt opp i ph.d.-programmet ved Det humanistiske fakultet. Programmet inneheld ein opplæringsdel på 30 studiepoeng, som utgjer seks månadar av tilsetjingsperioden.
Kvalifikasjonar og eigenskapar:
Søkjaren må:
Ha norsk mastergrad eller tilsvarande utanlandsk grad innan religionsvitskap, historie, eller eit tilgrensande fagområde. Det er ein føresetnad at mastergraden er oppnådd innan søknadsfristen går ut. Annan grad enn norsk mastergrad blir vurderte etter krav frå Direktoratet for høgare utdanning og kompetanse.
Ha evne til å arbeide sjølvstendig, strukturert og ha gode samarbeidsevner.
Ha gode munnlege og skriftlege ferdigheiter i engelsk.
Kunne arbeide med kjeldemateriale på klassisk hebraisk og/eller klassisk/koiné gresk, og kunne dokumentere sine kunnskapar i eitt eller begge språka. Kunnskapar i andre språk som er relevante for forskingsprosjektet er ein føremon.
Søkjarar må leggje fram ei prosjektskisse til eit forskingsprosjekt som skal munne ut i ei doktorgradsavhandling, og ein framdriftsplan for prosjektet.
Ved vurderinga av søknadene blir det lagt vekt på den vitskaplege kvaliteten i prosjekta, kor gjennomførlege dei skisserte prosjekta er, og dei faglege grunnkvalifikasjonane hjå søkjarane. Det vil vidare bli lagt vekt på fagstrategiske omsyn, motivasjon og personleg eignaheit.
Ein arbeidsstad i hjartet av Bergen – nær både byliv og natur.
Løn som stipendiat (stillingskode 1017), som for tida svarar til ei brutto årsløn på kr 568 700 i full stilling. Vidare lønsopprykk skjer etter ansiennitet i stillinga.
Medlemskap i Statens pensjonskasse, som inneber ei trygg tenestepensjonsordning, moglegheit for uføre- og etterlatnepensjon, samt tilgang til gunstige bustadlån.
Slik søkjer du stillinga:
Søknaden skal sendast elektronisk via lenkja «SØK STILLINGA» på denne sida. Følg stega i søknadsprosessen og legg inn følgjande:
Under «Søknadstekst»: Skriv ei kort utgreiing om dine forskingsinteresser og motivasjon for å søkje stillinga.
Under «CV», oppgi:
Personalia.
Erfaringar og kvalifikasjonar (fyll inn dei seksjonane som er relevante for deg). Publikasjonar/vitskaplege produksjonar kan leggjast ved som separat dokument dersom ønskjeleg (publikasjonsliste).
Språkferdigheiter.
Minst to referansepersonar. Ein av desse må vere hovudrettleiaren for masteroppgåva eller tilsvarande oppgåve.
Under «Vedlegg» skal du lasta følgjande opp som separate dokument:
Prosjektskisse på inntil 12 000 teikn medrekna mellomrom (litteraturliste ikkje medrekna). Prosjektskissa skal tydeleg skildre det vitskapelege prosjektet, inkludert forskingsbakgrunn, hovudproblemstillingar, teori, metode, etiske aspekt og empiri som skal nyttast i prosjektet.
Litteraturliste for prosjektskissa.
Framdriftsplan for prosjektet som tek omsyn til ph.d.-programmet sin opplæringsdel.
Karakterutskrift og vitnemål for bachelor- og mastergrad skal lastast opp frå Vitnemålsportalen. Dersom desse ikkje er tilgjengelege via portalen, last dei opp som vanlege filer. Dersom omfanget på masteroppgåva ikkje kjem fram av karakterutskrifta eller vitnemålet, må du leggja ved stadfesting frå den gradgjevande institusjonen som oppgir oppgåva sitt omfang i ECTS.
Kort samandrag av masteroppgåva eller tilsvarande oppgåve (inntil tre sider).
Liste over eventuelle faglege publikasjonar (publikasjonsliste).
Inntil tre fullstendige faglege publikasjonar kan leggjast ved dersom aktuelt.
Relevante attestar som støttar opp under dine kvalifikasjonar, ferdigheiter, erfaringar eller eigenskapar.
Søknadstekst, CV og vedlegg må vere på norsk, eit anna skandinavisk språk eller engelsk. Dokumentasjon på andre språk må følgjast av attestert omsetjing. Vedlegga kan vere i Word- eller PDF-format, og må lastast opp i Jobbnorge innan søknadsfristen. Namngje vedlegga tydeleg.
Vurderingskomiteen kan i særskilde tilfelle be om ettersending av dokumentasjon.
Kandidatar som tidlegare har hatt stipendiatstilling ved Universitetet i Bergen kan ikkje søkje stillinga.
Tilsetjingsperioden kan bli redusert for kandidatar som tidlegare har vore tilsett i ei rekrutteringsstilling ved ein annan institusjon.
Tilsetjing i stillinga krev at ein har sin daglege arbeidsplass ved Universitetet i Bergen og følgjer gjeldande retningslinjer.
Generell informasjon:
Utfyllande opplysningar om stillinga kan ein få ved å kontakte instituttleiar Teemu Ryymin, e-post: Teemu.Ryymin@uib.no, tlf.: +47 55 58 38 79 eller prosjektleiar for AViVa Joseph Scales, e-post: joseph.scales@uib.no, tlf.: + 47 55 58 51 99.
Spørsmål om den elektroniske søknadsprosessen kan rettast til Det humanistiske fakultet på e-post: fakadm@hf.uib.no.
Universitetet i Bergen nyttar meirinnsyn ved tilsetjing i vitskaplege stillingar. Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.
Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.
Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.
Livet som ph.d.-kandidat ved UiB
Astrid Nybø forteller om livet og arbeidshverdagen som ph.d.-kandidat ved UiB.
