Stipendiat i nordisk litteratur ved Institutt for lingvistiske, litterære og estetiske studium
Søknadsfrist: 01.09.2024
Publisert
Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.
Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.
Vil du vere med å forme framtida?
Stipendiat i nordisk litteratur ved Institutt for lingvistiske, litterære og estetiske studium
Velkomen som søkjar til ei stipendiatstilling i nordisk litteratur ved Institutt for lingvistiske, litterære og estetiske studium. Planlagd oppstart er 1. desember 2024, eller etter avtale. Stillinga er for ein åremålsperiode på fire år. Stipendiatstillinga er open for prosjekt innafor forskingsfelta til Forskargruppa i nordisk litteratur.
Om instituttet:
Institutt for lingvistiske, litterære og estetiske studium (LLE) har kring 80 vitskaplege tilsette, 17 administrativt tilsette, rundt 40 ph.d.-kandidatar og sju postdoktorar. Instituttet femner om faga allmenn litteraturvitskap, digital kultur, klassiske fag, kunsthistorie, nordisk litteratur, språk og fagdidaktikk, norrøn filologi, norsk som andrespråk, språkvitskap og teatervitskap.
Av dei fast tilsette ved LLE arbeider for tida seks innanfor nordisk litteratur. I tillegg er det for tida to ph.d.-stipendiatar i disiplinen. Instituttet huser òg redaksjonane for Norsk Ordbok, Bokmålsordboka og Nynorskordboka, og leier arbeidet med Termportalen og Clarino Bergen Centre.
Om forskargruppa:
Forskargruppa høyrer heime på Universitetet i Bergen, LLE, men samlar òg forskarar frå Høgskulen på Vestlandet og Norsk lærarakademi. Deltakarane har prosjekt om skandinaviske forfattarskap, arbeider med tematikkar frå nordisk litteratur, og/eller ser på teoretiske spørsmål som er relevante for en utforsking av nordisk litteratur, inkludert litteraturdidaktiske emne.
Materialet vi samlar oss om, strekkjer seg historisk frå 1700-talet til i dag, og inneheld både kanoniske verk, samtidslitteratur og sjangrar som litteraturhistorieskriving, litteraturkritikk, essay, brev og taler. Målet for forskargruppa er å løfte fram den einskilde forskarens individuelle prosjekt og sikre kvaliteten av det gjennom diskusjonar og felles tekstlesing. Forskergruppa er eit inkluderande arbeidsfellesskap for forskarar i alle stadier av karriereløpet. For ytterlegare informasjon sjekk her. Stipendiaten vert rettleidd av ein av dei fast tilsette ved LLE som inngår i forskargruppa, og det er ein føresetnad at stipendiaten deltek i forskargruppa sine aktivitetar.
Om stipendiatstillinga og forskarutdanninga
Stipendiatstillinga har som hovudmål å leie fram til ein ph.d.-grad, som kvalifiserer for sjølvstendig forskingsverksemd og for anna arbeid i samfunnet som krev særleg kompetanse. Samla stipendperiode er fire år, der 25 prosent av tida nyttast til anna, karrierefremjande arbeid knytt til undervising, formidling og administrasjon. Plan for denne delen av stillinga blir avtalt med instituttet ved tilsetjing.
Stipendiatar skal delta i Det humanistiske fakultetet sitt ph.d.-program. Ph.d.-programmet inneheld ein opplæringsdel på 30 studiepoeng, som til saman utgjer eitt semester. Sett under eitt, inneber det at 2,5 av fire år er sett av til arbeid med sjølve doktorgradsprosjektet.
Kvalifikasjonar og personlege eigenskapar:
Søkjar må ha norsk mastergrad eller tilsvarande utanlandsk grad innan eit fagområde som gir opptaksgrunnlag for eit ph.d.-prosjekt i nordisk litteratur. Det er ein føresetnad at mastergraden er oppnådd innan søknadsfristen går ut. Søkjarar som berre dokumenterer annan grad enn norsk mastergrad blir vurderte etter krav frå Nasjonalt organ for kvalitet i utdanning (NOKUT) og Det humanistiske fakultet sine retningsliner.
Søkjar må kunne arbeide sjølvstendig, strukturert, og ha gode samarbeidsevner.
Søkjar må meistre engelsk, skriftleg og munnleg.
Søkjar må meistre norsk eller eit anna skandinavisk språk, skriftleg og munnleg.
Søkjarar vil bli vurderte etter opptakskrav frå Det humanistiske fakultet, etter Ph.d.-programmets pkt. 2.1.
Søkjarar må leggje fram ei prosjektskisse til eit forskingsprosjekt som skal munne ut i ei doktorgradsavhandling, samt ein framdriftsplan for prosjektet.
Ved vurderinga av søknadene blir det lagt vekt på den vitskaplege kvaliteten i prosjekta, kor gjennomførleg dei skisserte prosjekta er, samt dei faglege grunnkvalifikasjonane hjå søkjarane. Det vil vidare bli lagt vekt på fagstrategiske omsyn, motivasjon og kor personleg eigna søkjarane er.
Vi tilbyr:
Eit godt og fagleg utfordrande arbeidsmiljø.
Løn tilsvarande lønssteg 55 (kode 1017) i det statlege lønsregulativet. Dette utgjer for tida ei brutto årsløn på kr 540 500 i full stilling. Vidare lønsopprykk skjer etter ansiennitet i stillinga.
Medlemskap i Statens pensjonskasse.
Stilling i ei inkluderande arbeidslivsverksemd (IA-verksemd).
Søknaden skal sendast elektronisk via lenkja «SØK STILLINGA» på denne sida. Søkjaren må nytte det elektroniske CV-skjemaet.
Søknaden skal innehalde:
Prosjektskisse (inntil fem sider/12 000 teikn medrekna mellomrom, litteraturliste ikkje medrekna). Prosjektskissa skal skildre det vitskapelege prosjektet tydeleg, med forskingsbakgrunn, hovudproblemstillingar, teori, metode, etiske aspekt og ein tidsplan for gjennomføring.
Litteraturliste for prosjektskissa.
Framdriftsplan for prosjektet.
Ei kort utgreiing om søkjaren sine forskingsinteresser og motivasjonen for å søkje stillinga.
CV.
Karakterutskrift og vitnemål for bachelor- og mastergrad. Dersom omfanget på masteroppgåva ikkje er oppgitt i karakterutskrifta eller vitnemålet for mastergraden, må det leggjast ved stadfesting frå den gradgjevande institusjonen som spesifiserer oppgåva sitt omfang i ECTS.
Eit kort samandrag av masteroppgåva eller tilsvarande oppgåve (inntil tre sider).
Liste over eventuelle faglege publikasjonar (publikasjonsliste).
Eventuelle publikasjonar (inntil tre).
Relevante attestar.
Namn og kontaktopplysningar til to referansepersonar, der ein av desse må vere hovudrettleiaren frå masteroppgåva eller tilsvarande oppgåve.
Søknad og vedlegg må vere på norsk, eit anna skandinavisk språk eller engelsk. Dokumentasjon på andre språk må følgjast av attestert omsetjing. Vedlegga kan vere i Word- eller PDF-format, og må lastast opp i Jobbnorge innan søknadsfristen.
Kandidatar som tidlegare har hatt doktorgradsstipend ved Universitetet i Bergen, kan ikkje søkje.
Tilsetjingsperioden kan bli redusert dersom den som blir tilsett tidlegare har vore tilsett i rekrutteringsstilling.
Tilsetjing i stillinga krev at ein har sin daglege arbeidsplass ved Universitetet i Bergen og at ein rettar seg etter dei retningslinene som til ei kvar tid gjeld for stillinga.
Generell informasjon:
Utfyllande opplysningar om stillinga kan ein få ved å kontakte:
Instituttleiar, professor Anders Fagerjord, e-post: anders.fagerjord@uib.no, telefon: +47 55 58 36 53, eller
Spørsmål om den elektroniske søknadsprosessen kan rettast til Det humanistiske fakultet på e-post: fakadm@hf.uib.no.
Universitetet i Bergen nyttar meirinnsyn ved tilsetjing i vitskaplege stillingar. Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.
Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.
Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju.