Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.
Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.
Vil du vere med å forme framtida?
Stipendiat
Ved Institutt for arkeologi, historie, kultur- og religionsvitskap er det ledig ei fireårig stipendiatstilling i kulturvitskap. Planlagd oppstart er 1. august 2023, eller etter avtale. Stillinga er for ein åremålsperiode på fire år.
Stillinga er knytt til prosjektet SAMLA og fagmiljøet i kulturvitskap ved AHKR. SAMLA er ein nasjonal infrastruktur for digital tilgjengeleggjering av tre norske tradisjonsarkiv, Etnofolkloristisk arkiv (Universitetet i Bergen), Norsk folkeminnesamling (Universitetet i Oslo) og Norsk etnologisk gransking (Stiftelsen Norsk folkemuseum). Universitetsbiblioteket er ansvarleg for utvikling av eit felles digitalarkiv for SAMLA som vil bli lansert i 2024. SAMLA er ei viktig satsing for å gjere folkloristisk materiale tilgjengeleg for forsking, undervisning og formidling, og det er venta at den utlyste stipendiaten vil bidra til å styrke forskinga på slikt materiale.
Kvalifikasjonar og personlege eigenskapar
Søkjarar må ha norsk mastergrad eller tilsvarande utanlandsk grad innafor kulturvitskap, kulturhistorie, etnologi, folkloristikk eller tilsvarande. Det er ein føresetnad at mastergraden er oppnådd innan søknadsfristen går ut. Søkjarar som berre dokumenterer annan grad enn norsk mastergrad blir vurderte etter krav frå Nasjonalt organ for kvalitet i utdanning (NOKUT) og Det humanistiske fakultet sine retningsliner.
Søkjarar må kunne arbeide sjølvstendig, strukturert og ha gode samarbeidsevner.
Søkjar må ha god kunnskap i norsk skriftspråk.
Søkjar må beherske engelsk, skriftleg og munnleg.
Søkjarar må skrive ein omtale av eit forskingsprosjekt som skal munne ut i ei doktorgradsavhandling.
Søkjarar vil bli vurderte etter opptakskrav frå Det humanistiske fakultet, etter Ph.d.-programmets pkt. 2.1.
Ved vurderinga av søknadene blir det lagt vekt både på den vitskaplege kvaliteten i prosjektomtalane til søkjarane, kor gjennomførleg dei skisserte prosjekta er, samt dei faglege grunnkvalifikasjonane hjå søkjarane. Det blir vidare lagt vekt på fagstrategiske omsyn, samt at søkjaren er motivert og personleg eigna for stillinga.
Om stipendiatstillinga
Stipendiatstillinga har som hovudmål å leie fram til ein ph.d.-grad, som kvalifiserer for sjølvstendig forskingsverksemd og for anna arbeid i samfunnet som krev særleg kompetanse. Samla stipendperiode er fire år, der 25 prosent av tida er pliktarbeid knytt til undervisning, formidling og administrasjon. Plan for denne delen av stillinga blir avtalt med instituttet ved tilsetjing. Dei forskingsadministrative oppgåvene kan bli knytt til prosjektet SAMLA.
Doktorgradsprosjektet til søkjaren som vinn gjennom skal forske i samlinga etter Torleiv Hannaas som i dag er del av Etnofolkloristisk arkiv ved UiB, sjå her . Denne samlinga utgjorde i si tid Folkeminnesamlingi, som blei oppretta ved Bergen Museum i 1921. Samlinga inneheld eit rikt materiale av segner, soger, balladar, gåter og anna folkloristisk materiale frå Vestlandet og Agder, samla inn frå midten av 1800-talet til 1920-talet. Hannaas-samlinga opnar for utforsking av vestlandsk kulturhistorie på to måtar. For det første gjennom studiar av førestellingsverder, folketru, folkeleg forteljartradisjon og språklege uttrykksformer. For det andre ved å studera innsamlingspraksisar og det vitskapelege og kulturpolitiske arbeidet innsamlinga av folkeminne var del av, både i Norge og internasjonalt. Vi ønskjer begge tematiseringar velkommen. Hannaas-samlinga er digitalisert gjennom SAMLA. Det er venta at stipendiaten skal ta det digitaliserte materialet aktivt i bruk, og såleis også bidra til å utvikle dei digitale løysingane til SAMLA-portalen.
Stipendiaten vil vera del av eit nasjonalt folkloristisk miljø gjennom SAMLA. Sjå SAMLA si nettside for meir informasjon om prosjektet.
Tilsetjingsperioden kan bli redusert dersom den som blir tilsett, tidlegare har vore tilsett i rekrutteringsstilling.
Tilsetjing i stillinga krev at ein har sin daglege arbeidsplass ved Universitetet i Bergen, Institutt for arkeologi, historie, kultur- og religionsvitskap, og rettar seg etter dei retningslinene som til en kvar tid gjeld for stillinga.
Om forskarutdanninga:
Stipendiatar skal delta i Det humanistiske fakultetet sitt ph.d.-program. Programmet inneheld ein opplæringsdel på 30 studiepoeng, krav til årleg framdriftsrapportering og godkjent midtvegsevaluering. Trykk her for meir informasjon om innhaldet i ph.d.-programmet ved Det humanistiske fakultet.
Vi tilbyr
Eit godt og fagleg utfordrande arbeidsmiljø.
Løn tilsvarande lønssteg 54 (kode 1017/LR20, alternativ 10) i det statlege lønsregulativet. Dette utgjer for tida ei årsløn på 501 200,-,- kroner brutto. Vidare opprykk skjer etter tenesteansiennitet i stillinga.
Medlemskap i Statens pensjonskasse.
Stilling i ei inkluderande arbeidslivsverksemd (IA-verksemd).
Gode velferdsordningar.
Slik søkjer du stillinga
Søknaden skal sendast elektronisk via lenkja «SØK STILLINGEN» på denne sida. Søkjaren må nytte det elektroniske CV-skjemaet.
Søknaden skal innehalde:
Prosjektomtale (inntil 5 fem sider/12 000 teikn medrekna mellomrom, litteraturliste ikkje medrekna). Prosjektomtalen skal skildre det vitskapelege prosjektet tydeleg, med forskingsbakgrunn, hovudproblemstillingar, teori, metode, materialar som skal nyttast, etiske aspekt osb.
Ein gjennomtenkt framdriftsplan for prosjektet.
Ei kort utgreiing om søkjaren sine forskingsinteresser og motivasjonen for å søkje stillinga.
CV.
Liste over eventuelle faglege publikasjonar (publikasjonsliste) .
Namn og kontaktinformasjon til to referansepersonar, ein av desse må vere hovudrettleiaren frå masteroppgåva eller tilsvarande oppgåve.
Eit kort samandrag av masteroppgåva eller tilsvarande oppgåve (inntil 3 tre sider).
Karakterutskrift og vitnemål for bachelor- og mastergrad. Dersom omfanget på masteroppgåva ikkje er oppgitt i karakterutskrifta eller vitnemålet for mastergraden, må det leggjast ved stadfesting frå den gradgjevande institusjonen som spesifiserer oppgåva sitt omfang i ECTS.
Relevante attestar.
Søknad og vedlegg må vere på norsk, eit anna skandinavisk språk eller engelsk. Dokumentasjon på andre språk må følgjast av attestert omsetjing. Vedlegga kan vere i Word eller pdf-format, og må lastast opp i Jobbnorge innan søknadsfristen.
Generell informasjon
Utfyllande opplysningar om stillinga kan ein få ved å vende seg til:
Den statlege arbeidsstyrken skal i størst mogleg grad spegle mangfaldet i befolkninga. Personar med innvandrarbakgrunn og personar med nedsett funksjonsevne blir oppmoda om å søkje stillinga.
Spørsmål om elektronisk søknadsprosedyre kan sendast på e-post til Det humanistiske fakultet: fakadm@hf.uib.no.
Universitetet i Bergen nyttar meirinnsyn ved tilsetjing i vitskaplege stillingar. Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.
