Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.
Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.
Ved Geofysisk institutt er det ledig ei fast stilling som administrasjonskonsulent (førstekonsulent/seniorkonsulent).
Vi søkjer ein positiv, nysgjerrig, driftig og strukturert medarbeidar til ei stilling i administrasjonen med eit stort spenn av oppgåver innan drift og leiarstøtte.
Geofysisk institutt er sentralt i universitetet sine satsingsområde klima og energiomstilling, og driv undervisning og forsking innan biogeokjemi, fornybar energi, fysisk oseanografi, klima og meteorologi. Instituttet har ein omfattande forskningsaktivitet i ein betydeleg prosjektportefølje. For nærare informasjon om instituttet, sjå www.uib.no/gfi.
Instituttadministrasjonen har 11 tilsette som yter administrativ støtte til fagmiljøa innan områda studieadministrasjon inkl. forskarutdanning, forskingskoordinering, forskingsadministrasjon, informasjonstenester, personal- og økonomiforvaltning. Administrasjonen si målsetjing er å leggje forholda best mogleg til rette slik at dei vitskapleg tilsette kan drive forsking, utdanning og formidling av høg kvalitet.
Arbeidsoppgåver
Den tilsette vil få varierte arbeidsoppgåver innan administrative tenester knytt til instituttets ekspedisjon.
Døme på oppgåver er:
Generelle administrative oppgåver som post, varemottak, adgangskort/nøklar, telefon, bestille rom
Innkjøp/bestilling av varer og tenester (som fagrekvirent)
Arbeidskontrakter for studentassistentar
Koordinere mottak av nye nye tilsette og gjesteforskarar
Møteførebuing og arrangementstøtte inklusive disputaser
Informasjonsarbeid, t.d. nyheitsbrev, arrangementsinformasjon på nett
Areal- og kontorforvaltning
Legge til rette for møter og skolebesøk ved instituttet
Stillinga sitt innhald kan verte endra som følgje av eininga sitt kontinuerlege utviklingsarbeid. Administrasjonskonsulenten skal rapportere til administrasjonssjefen som er næraste overordna. Vi oppmoder alle interesserte til å søke. Mangler du formell utdanning eller har kort arbeidserfaring kan det vere aktuelt å tilby ei stilling som førstekonsulent.
Kvalifikasjonar og eigenskapar
Du må ha
Utdanning på bachelornivå og det er ønskeleg med mastergrad. Tilsvarande kvalifikasjonar kan du ha oppnådd gjennom lang og allsidig praksis saman med relevant etter- og vidareutdanning.
Erfaring frå koordineringsarbeid vil vere ei føremon. Det same gjeld kjennskap til administrering av nettsider og relevant praksis frå universitets- eller høgskulesektoren.
Vi vil vektlegge brei erfaring i bruk av Microsoft Office-programvare og kjennskap til datasystema som er i bruk ved UiB (t.d. innkjøpssystem, FS, ephorte).
Språk
God skriftleg framstillingsevne på båe målføre i tillegg til engelsk skriftleg og munnleg.
Personlege eigenskapar
Du er serviceinnstilt, effektiv og strukturert.
Du har evne til å arbeide sjølvstendig og vere ansvarsmedviten.
Du trivst med å handtere mange og ulike oppgåver i eit dynamisk og internasjonalt miljø.
Du er omstillingsdyktig og initiativrik.
Du er ivrig etter og motivert for å bli vår nye kollega.
Personlege eigenskapar som er naudsynte for stillinga vil bli vektlagt.
Vi kan tilby
Eit godt og fagleg utfordrande arbeidsmiljø.
Stillingskategori som førstekonsulent 1408 eller seniorkonsulent 1363 etter tenesteansiennitet og kvalifikasjonar.
Løn kr 509 300 – 575 400 per år før skatt avhengig av tenesteansiennitet og kvalifikasjonar (svarar til lønssteg 51-59 i statens regulativ). For særleg kvalifiserte søkjarar kan det verte aktuelt å vurdere høgare løn.
Utfyllande opplysningar om stillinga kan ein få ved å vende seg til:
Administrasjonssjef Kristin Kalvik, kristin.kalvik@uib.no, telefon 55582601
Den statlege arbeidsstyrken skal i størst mogleg grad spegle mangfaldet i befolkninga. Personar med innvandrarbakgrunn og personer med nedsett funksjonsevne blir oppmoda om å søkje stillinga.
Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.
