Forskar (prosjektkoordinator, mellombels) ved Institutt for helse, miljø og likeverd (HEMIL)

Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.

Det psykologiske fakultet består av fem institutter og to senter. Les meir om fakultet og tilhøyrande institutt.

Kunnskap som formar samfunnet

Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.

Vil du vere med å forme framtida?

Forskar (prosjektkoordinator)

Vi ønskjer deg velkommen til å søkje på ei interessant og utfordrande stilling ved Institutt for helse, miljø og likeverd (HEMIL), Det psykologiske fakultet, Universitetet i Bergen. Instituttet har ledig ei mellombels 100 % forskartstilling som prosjektkoordinator. Stillinga er for ein periode på 3 år med oppstart 1. februar 2025 og knytt til prosjektet «Trust and identity among European adolescents and emerging adults» (ENGAGED), finansiert av Horisont Europa. HEMIL er koordinator for prosjektet.

Om prosjektet/arbeidsoppgåver:

ENGAGED skal undersøkje kva rolle sosial, kulturell og politisk identitet spelar for ungdom og unge vaksne sitt engasjement og deltaking i lokalsamfunnet og demokratiske prosessar. Gjennom prosjektet skal det samlast inn kvalitative og kvantitative data frå fem partnarland (England, Noreg, Portugal, Romania og Spania). Vidare skal ungdom i samarbeid med tre frivillige organisasjonar i England, Portugal og Spania utforme forslag til politikarar på kva tiltak som er viktige for å engasjere ungdom i lokalmiljøet og i demokratiske prosessar. 

Arbeidsoppgåver inkluderer: 

• vere den næraste medarbeidaren til prosjektleiaren
• vere ansvarleg for dagleg koordinering og administrasjon av prosjektet og ha dialog med dei involverte universiteta og partnarane
• ha ansvar for oppfølging av prosjektadministrasjon og informasjonsflyt, budsjett, saksarbeid og utviklings- og utgreiingsoppgåver
• koordinere og gjennomføre rapportering til EU 
• delta i databehandling, kvalitetssikring, rapportering og publisering 
• delta i tilsvarande arbeidsoppgåver i prosjektet «Health Behaviour in School-aged Children», som bidrar med dei kvantitative dataene til prosjektet 
• bidra i forskningsgruppa Social Influence Processes on Adolescent Health (SIPA)

Kvalifikasjonar og eigenskapar:

Søkjar må ha:

• mastergrad, gjerne i helsefremmande arbeid
• kunnskap om juridiske og etiske retningslinjer for handtering av persondata
• god skriftleg og munnleg formuleringsevne på norsk og engelsk
• evne til å arbeide systematisk og strukturert
• evne til å takle samansette oppgåver og ha god arbeidskapasitet
• evne til å arbeide både sjølvstendig og i team
• evne til å vere fleksibel og til å finne løysingar
• gode kommunikasjons- og samarbeidsevner
• engasjement og interesse for forsking
• kreativitet og evne til å ta initiativ
• personlege eigenskapar som passar til stillinga

Søkjar bør ha:

• relevant erfaring med prosjektkoordinering, og erfaring frå internasjonalt samarbeid/prosjekt er ei føremon
• erfaring med behandling av kvantitative forskingsdata, samt kjennskap til kvalitativ analyse

Vi kan tilby:

• Spennande og utviklande arbeidsoppgåver i eit sterkt fagmiljø
• Løn etter lønssteg 54 -58 ved tilsetjing. Dette utgjer ei årsløn på kr 532 200- 565 900 brutto. Vidare opprykk skjer etter tenesteansiennitet i stillinga.
• Medlemsskap i Statens pensjonskasse
• Gode velferdsordningar

Søknaden skal innehalde:

• Ei kort utgreiing om søkjaren sine forskingsinteresser og motivasjonen for å søkje stillinga
• CV
• Attesterte kopiar av karakterutskrifter, vitnemål og relevante attestar (søkjarar med utanlandsk utdanning må leggje ved både vitnemål på originalspråket og autoriserte omsetjingar)
• Liste over eventuelle vitskaplege arbeid du vil det skal takast omsyn til ved vurderinga, med opplysningar om kvar dei er offentleggjorde
• To referansar (namn og kontaktinformasjon)

Søknad og vedlegg med attesterte omsetjingar til engelsk eller eit skandinavisk språk må lastast opp i Jobbnorge. Vi gjer merksam på at søknader vert vurderte med den informasjonen som er tilgjengeleg i JobbNorge når søknadsfristen går ut. Det er søkjaren sitt ansvar å sørgje for at all informasjonen er lagt inn innan fristen

Generell informasjon:

Utfyllande opplysningar om stillinga kan ein få ved å vende seg til: 

• Professor Oddrun Samdal, prosjektleiar oddrun.samdal@uib.no; tlf. 97 07 09 04

Mangfald er ein styrke og gjer at vi kan løyse oppgåvene våre endå betre. UiB treng difor kvalifiserte medarbeidarar uavhengig av kjønn, etnisitet, religion, livssyn, funksjonsnedsetjing, seksuell orientering, kjønnsidentitet, kjønnsuttrykk og alder.

Universitetet i Bergen nyttar meirinnsyn ved tilsetjing i vitskaplege stillingar.

Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.

Vi oppmodar søkjarar med funksjonsnedsetjing, innvandrarbakgrunn eller hól i CV-en til å søke. Dersom du kryssar av for dette i søknaden kan du bli positivt særbehandla. Vi inviterer alltid minst ein kvalifisert søkjar frå kvar av desse gruppene til intervju. Nærare om tilsettingsprosessen her.

Søk på stillingen