Institutt for lingvistiske og nordiske studium

Om stillinga

Ei stilling som stipendiat (SKO 1017) i norrøn filologi er ledig ved Institutt for lingvistiske og nordiske studium, Universitetet i Oslo.

Stipendiatstillinga er knytt til det NFR-finansierte prosjektet Old Norse Poetry and the Development of Saga Literature (SagaPoetry), prosjektnummer 313688. Hovudmålet med prosjektet er å røkja etter kva skaldedikting hadde å seia for framvoksteren av norrøn sagalitteratur.

Prosjektet tek utgangspunkt i to overordna hypotesar:

• Fyrst at skaldedikt og i ein viss mon eddadikt spela ei heilt avgjerande rolle i framvoksteren av norrøn sagalitteratur, ei rolle som var langt viktigare enn det tidlegare forsking har ansa på.
• Dinest at det var ei utvikling der tidlege sagaforfattarar siterte poesi som kjelder og som dokumentasjon av historiske fakta, medan poesien seinare vart ein integrert del av produksjonen av sagalitteratur. Etter kvart vart skikken med å sitera poesi eit stilistisk ideal i seg sjølv, og sagaforfattarar kom då meir og meir til å dikta skaldevers sjølve og eigna dei til personane dei skreiv om.

For meir informasjon sjå heimesida åt prosjektet: Norrøn poesi og utviklingen av sagalitteraturen - Institutt for lingvistiske og nordiske studier (uio.no)

Søkjarar skal leggja fram ein plan for eit sjølvstendig forskingsprosjekt som tek opp eitt eller fleire kjernetema i det overordna prosjektet. Mogelege emne femner om etterrøkingar i bakgrunnen åt sentrale prosimetriske genrar og verk. Dei noverande medlemene av prosjektet studerer islendingesoger, kongesoger, fornaldarsoger, Landnámabók og skaldedikt som førelauparar til soger. Søkjarar kan velja å utvida perspektivet på eit av desse emna eller å utforska andre genrar. Til dømes er ikkje samtidssoger eller Edda-prosimetrum dekte i prosjektskildringa. Søkjarar kan òg utforska/granska sider av den poetiske tradisjonen som er relevante for framvoksteren av sagalitteratur, eller gjeva seg i kast med hovudhypotesane for prosjektet på annan måte. Val av metodologisk og teoretisk råmeverk og perspektiv bør gjerast greie for av søkjarane.

Meir om stillinga

Den som vert tilsett, kjem til å verta tilknytt den organiserte forskarutdanninga ved fakultetet. Det vitskaplege arbeidet skal munna ut i ei doktoravhandling som skal forsvarast ved fakultetet med tanke på å oppnå graden ph.d. Det vert forventa at den som vert tilsett, vert del av eit forskingsmiljø eller -nettverk og bidreg til fagleg utvikling i miljøet. Sjå meir informasjon om doktorgrad og forskarkarriere.

Tilsetjinga gjeld for ein periode på 3 år. Doktorgradsstipendiatar som leverer doktoravhandlinga til gransking med skriftleg tilråding frå rettleiar innan 3 år eller 3 ½ år etter stipendperioden tok til, får tilbod om høvesvis 12 eller 6 månaders gjennomføringsstipend.

Kvalifikasjonskrav

• mastergrad eller tilsvarande utdanning i norrøn filologi eller i litteraturvitskap, lingvistikk eller mellomalderstudium so sant studiet har hatt ein monaleg norrøn komponent. Avsluttande grad skal vera oppnådd og sensur skal liggja føre ved søknadsfristen.
• god framstillingsevne skriftleg og munnleg på engelsk. Arbeidsspråket i prosjektet for intern kommunikasjon og prosjektmøte kjem til å vera skandinavisk (norsk, svensk, dansk), og ein viss tame i eit skandinavisk språk er difor påkravd.
• at ein er personleg eigna og motivert for stillinga

For å verta oppteken til doktorgradsprogramma ved Universitetet i Oslo vert det kravt at søkjaren har minst femårig grunnutdanning (mastergrad eller tilsvarande), medrekna ei masteroppgåve på minimum 30 studiepoeng. I særskilde tilfelle kan fakultetet gjeva opptak på grunnlag av eittårig mastergrad, etter ei vurdering av omfanget og kvaliteten på studiet.

Ved vurdering av søknadene kjem det til å verta lagt vekt på:

• den vitskaplege kvaliteten på prosjektet, medrekna kor aktuelt og nyskapande det er
• dei faglege og personlege føresetnadene søkjaren har for å gjennomføra prosjektet innan tidsråma
• føresetnadene søkjaren har for å gjennomføra forskarutdanninga
• gode samarbeidseigenskapar og evne til å vera del av faglege fellesskapar på tvers av disiplinar

Søkjarar som nyleg har avlagt avsluttande eksamen med særs gode resultat, kan verta prioriterte.

Me tilbyd

• løn frå kr. 482 200 til kr. 526 000, avhengig av kompetanse
• kompetanseutvikling i eit stimulerande akademisk miljø
• medlemskap i Statens Pensjonskasse
• gode velferdsordningar

Søknaden skal ha med

• søknadsbrev som skildrar kvalifikasjonar og motivasjon for stillinga
• Curriculum Vitae (med oversyn over utdanning, tilsetjingar, undervisningsrøynsle, administrativ røynsle og andre kvalifiserande aktivitetar, forutan publiserte og upubliserte arbeid)
• karakterutskrifter for bachelor- og mastergrad. Søkjarar med utdanning frå ein utanlandsk institusjon vert bedne om å leggja ved ei rettleiing til karaktersystemet som vert nytta der
• prosjektskildring på 3–5 sider, maksimum 14 000 teikn (sjå mal for prosjektskildring), inkludert framdriftsplan

Ver merksam på at alle dokument må vera anten på engelsk eller eit skandinavisk språk.

Diplom, vitnemål, masteroppgåver og liknande skal ikkje leggjast ved søknaden, men kan verta etterspurde seinare.

Søknad med vedlegg må sendast inn via det elektroniske rekrutteringssystemet vårt; ver gild å klikka «Søk stillinga».

Det kjem til å verta nytta intervju i tilsetjingsprosessen.

Andre opplysningar

Me viser til forskrift om tilsetjingsvilkår, attåt retningsliner for søknadsprosess og tilsetjing i stipendiatstillingar.

I samsvar med paragraf 25, 2. ledd, i offentleglova kan opplysningar om søkjaren verta gjorde offentlege jamvel om søkjaren har bede om ikkje å verta oppførd på søkjarlista.

UiO har ein overtakingsavtale for alle tilsette med føremål å sikra rettane til forskingsresultat m.m.

UiO har eit personalpolitisk mål om å oppnå ei balansert kjønnssamansetjing og rekruttera personar med innvandrarbakgrunn. Som IA-bedrift vil me leggja tilhøva til rette for medarbeidarar med nedsett funksjonsevne.

Kontaktpersonar

For spørsmål om stillinga:

• Professor Åshild Næss

Søkjarar kan kontakta prosjektleiar Mikael Males med spørsmål eller for å få den fullstendige prosjektskildringa.

For spørsmål om rekrutteringsprosessen: Personalrådgjevar Tonje Olsen

Søk på stillingen