Førstekonsulent studieadministrasjon - Det juridiske fakultet
Søknadsfrist: 06.06.2021
Universitetet i Bergen
Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.
Masterprogrammet i rettsvitskap er ei av Noregs mest populære utdanningar, og fakultetet er blant dei leiande forskingsmiljøa i Norden innan strafferett, straffeprosess og politirett.
Ei av Noregs mest populære utdanningar treng fleire dyktige administrative medarbeidarar
Kunnskap som formar samfunnet
Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.
Vil du vere med å forme framtida?
Førstekonsulent (studieadministrasjon)
I studieseksjonen ved Det juridiske fakultet er det ledig ei fast stilling i 100 % stilling som førstekonsulent. Tiltreding så raskt som mogleg.
Studieseksjonen bidreg til å utdanne framtidas juristar og ivareta fakultetet sitt samfunnsoppdrag. Seksjonen arbeider kontinuerleg med å vidareutvikle kvalitet i studiet og å forbetre og effektivisere interne prosessar og rutinar. Personen i stillinga skal bidra i dette arbeidet. Fakultetet nyttar i utstrekt grad digitale hjelpemiddel i både vurdering, undervisning og forskingsformidling.
Masterprogrammet i rettsvitskap ved Det juridiske fakultet har vunne fleire prisar, og revidert studieordning vert lansert til hausten. Dette året har vi også starta opp arbeidet med prosjektet Bedre læring, bedre jurister.
Arbeidsoppgåver
Stillinga inneber studieadministrative oppgåver innanfor blant anna undervisning, eksamen og saksbehandling, i tillegg til å avlaste kollegaer ved arbeidstoppar og fråvær.
Stillinga passar særs bra for deg som er fleksibel og tek ei utfordring på strak arm, samstundes som du kan arbeide nøyaktig og effektivt etter prosess- og rutinerettleiingar. Du skal også bidra i utvikling av desse. Du vil få utfordrande og varierte arbeidsdagar, og må difor evne å halde hovudet kaldt i hektiske periodar.
Den som blir tilsett vil primært inngå i seksjonen si studieårsgruppe, men kan også få andre studieadministrative oppgåver.
Kvalifikasjonar og eigenskapar
Høgare utdanning, minimum bachelorgrad. Du treng ikkje ha juridiske emne i graden din, og kandidatar frå alle relevante fagområde blir oppmoda til å søkje
Praksis og erfaring frå studieadministrativt arbeid, saksbehandling og prosjektarbeid er ein føremon. Erfaring frå organisasjons- og servicearbeid kan også vere relevant
God skriftleg og munnleg formuleringsevne på norsk(begge målformer) og engelsk
God digital kompetanse og systemforståing
Effektiv, ansvarsbevisst, initiativrik og fleksibel
Evne til å arbeide sjølvstendig
Evne til å prioritere mellom oppgåver og trivst med å halde orden på fleire parallelle prosessar og aktivitetar
Gode kommunikasjons- og samarbeidsevner
Relevant praksis og personlege eigenskapar naudsynte for stillinga vil bli særskild vektlagt
Vi kan tilby
Varierte oppgåver, sjølvstendig ansvar og gode moglegheiter for utvikling
Hyggelege, engasjerte og dyktige kollegaer og eit godt og inkluderande arbeidsmiljø
Løn som førstekonsulent etter lønssteg 50 - 55 (p.t. kr. 451 700 – 490 600) (kode 1408 /LR 21) i det statlege lønsregulativet, avhengig av tenesteansiennitet og kvalifikasjonar. For særleg godt kvalifiserte søkjarar kan ein vurdere høgare løn
Lån-, pensjons- og forsikringsordning i Statens pensjonskasse
Generell informasjon:
Utfyllande opplysningar om stillinga får du ved å vende deg til:
Den som blir tilsett må rette seg etter dei retningslinjene som til ei kvar tid gjeld for stillinga.
Den statlege arbeidsstyrken skal i størst mogleg grad spegle mangfaldet i befolkninga. Det er eit personalpolitisk mål å få ei balansert alders- og kjønnssamansetjing. Personar med innvandrarbakgrunn og personar med nedsett funksjonsevne blir oppmoda om å søkje stillinga.
Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teken til følgje, skal søkjaren varslast om dette.
Søknad og CV skal sendast elektronisk via lenka ”Søk stillinga”.
Nærare informasjon om tilsettingsprosessen finn du her.