Ved Det medisinske fakultet, Institutt for global helse og samfunnsmedisin, er det ledig ei fast stilling som førsteamanuensis (50 %) i medisin (samfunnsmedisin).

Stillinga er knytt til Fagområde samfunnsmedisin, arbeids- og miljømedisin og helseledelse.

Ein stillingsomtale med nærare presisering av fagkrins og ansvarsområde, særlege plikter og andre tilhøve som det vert lagt vekt på ved tilsetjinga, finn du lenger ned på sida.

Utfyllande opplysningar om stillinga får ein ved å kontakte:

• Professor Ingvild Fossgard Sandøy, e-post ingvild.sandoy@uib.no, tlf 55586075 / 55588554 eller
• Instituttleiar Guri Rørtveit, e-post guri.rortveit@uib.no, tlf 55586141

Kvalifikasjonar

• Søkjar må ha legeutdanning og norsk doktorgrad i relevant fagområde eller tilsvarande kompetanse
• Den som vert tilsett skal undervise i praktisk samfunnsmedisin, miljømedisin og trygdemedisin.
• Det er ein føremon om søkjar er spesialist i samfunnsmedisin og har praktisk erfaring frå kommunalt samfunnsmedisinsk arbeid
• Det vil bli lagt vekt tidlegare undervisingserfaring i samfunnsmedisinske tema og pedagogiske evner
• Pedagogisk basisutdanning er eit krav for stillinga. Den som blir tilsett vil få tilbod om opplæring dersom kravet ikkje er oppfylt før tilsetjing

Den tilsette skal arbeide med samfunnsmedisinsk undervising og forsking innanfor fagområdet samfunnsmedisin, arbeids- og miljømedisin og helseledelse og må kunne dokumentere eiga forsking innanfor folkehelse, miljømedisin, trygdemedisin eller nærliggande felt.

Det vert lagt vekt på praktisk erfaring med kommunalt samfunnsmedisinsk arbeid. Vidare vert det lagt vekt på dokumentert vilje og evne til samarbeid.

Undervisingsspråket er til vanleg norsk. Det vert kravd at den som vert tilsett, kan undervise på norsk eller eit anna skandinavisk språk innan to år etter tilsetjinga. Kurs vert tilbode.

Løn

Førsteamanuensis vert lønt etter lønssteg 66 (kode 1011/lønsramme 24.10), for tida kr 586 500, eller lønssteg 68 (spesialistutdanning) for tida kr 607 700. Løn er brutto pr. år for ei fulltidsstilling i lønsregulativet til staten ved tilsetjing, og vidare opprykk skjer etter tenesteansiennitet i stillinga. Det vert trekt 2 % pensjonsinnskot til Statens pensjonskasse. For særleg kvalifisert søkjar kan det verte aktuelt å vurdere høgare løn.

Vi kan tilby

• eit godt og internasjonalt arbeidsmiljø og spanande arbeidsoppgåver i eit fakultet med fagmiljø som hevdar seg godt nasjonalt og internasjonalt
• faglege utfordringar med gode høve for personleg utvikling og kompetanseutvikling
• god pensjonsordning i Statens pensjonskasse
• stilling i ei inkluderande arbeidslivsverksemd (IA-verksemd)
• gode velferdsordningar

Du kan lese meir om kva Universitetet i Bergen kan tilby som arbeidsgivar ved å gå inn på nettsida:

http://www.uib.no/poa/74687/hva-kan-universitetet-tilby-sine-medarbeidere

Retningsliner

Den som vert tilsett pliktar å ta del i undervising og eksamen etter dei studieordningane som gjeld til kvar tid og til utan godtgjersle å rette seg etter dei endringane som gjennom lov måtte bli vedtekne om fagkrins, pensjonsordning og aldersgrense.

Kvinner vert spesielt oppmoda om å søkje. Dersom dei sakkunnige finn at fleire søkjarar har tilnærma like kvalifikasjonar, vil reglane om kjønnskvotering i Personalreglementet for vitskaplege stillingar verte følgde.

Den statlege arbeidsstyrken skal i størst mogleg grad spegle mangfaldet i befolkninga. Det er difor eit personalpolitisk mål å få ei balansert alders- og kjønnssamansetjing. Personar med innvandrarbakgrunn og personar med nedsett funksjonsevne vert oppmoda om å søkje stillinga.

Universitetet i Bergen nyttar meirinnsyn ved tilsetjing i vitskaplege stillingar. Opplysningar om søkjaren kan verte offentleggjorde sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teken til følgje, skal søkjaren varslast om dette.

Den som vert tilsett må rette seg etter dei retningslinene som til kvar tid gjeld for stillinga.

Søknad

Slik søkjer du stillinga:

Send søknad og CV som inneheld fullstending oversikt over tidlegare utdanning og tidlegare arbeid/erfaring, samt vedlegg elektronisk via lenkja «Søk stillingen» på denne sida.

Legg ved:

● vitnemål og attestar

● fullstendig publikasjonsliste

● liste med vedlegg som dokumenterer dine pedagogiske kvalifikasjonar

● ei liste over vitskapelege arbeid du vil det skal takast omsyn til ved vurderinga, med opplysning om kvar dei er offentleggjorde

● vitskapelege arbeid du vil det skal takast omsyn til ved vurderinga (maks 10) i passande format (pdf) skal følgje med søknaden som vedlegg

Det er særs viktig at kvart av dei vitskaplege arbeida som det skal takast omsyn til ved vurderinga i sin heilskap vert lasta opp som vedlegg til søknaden.

Søknadane vert sendt elektronisk til den sakkunnige nemnda.

Vi gjer merksam på at søknadar vert vurdert med den informasjonen som ligg føre i Jobbnorge når søknadsfristen går ut.

Ein viser elles til «Reglement for ansettelse i vitenskapelige stillinger og faglige/administrative lederstillinger».

Nærare om tilsettingsprosessen her.

Stillingsomtale

FØRSTEAMANUENSIS

Ved Det medisinske fakultet, Institutt for global helse og samfunnsmedisin, er det ledig ei fast stilling som førsteamanuensis (50 %) i medisin (samfunnsmedisin).

Om instituttet

Instituttet: https://www.uib.no/igs

Institutt for global helse og samfunnsmedisin er eitt av fem institutt under Det medisinske fakultet. Til instituttet høyrer for tida om lag 60 faste vitskapleg tilsette og 25 faste tekniske og administrativt tilsette. Instituttet har omlag 19 postdoktorar, om lag 150 stipendiatar/doktorgradsstudentar, og rundt 170 mastergradstudentar får undervising frå instituttet. Dei tilsette er organisert i fagområde, og alle vitskapeleg tilsette deltek og i forskingsgrupper, undervisingsgrupper og administrasjon.

Institutt for global helse og samfunnsmedisin gir undervising i samfunnsmedisin og andre fag til medisinstudentar, og i samfunnsfarmasi til farmasistudentar og driv i tillegg masterprogram i internasjonal helse, helsevitskap og helseleiing. Forsking og undervising ved instituttet omfattar eit breitt spekter av disiplinar innan samfunnsmedisin, allmennmedisin, epidemiologi, helsefag, global helse, farmasi og statistikk. Instituttet har 15 forskingsgrupper.

Den som vert tilsett skal vere del av fagområdet samfunnsmedisin, arbeids- og miljømedisin og helseleiing (SAMLET) og inngå i ei av dei eksisterande forskingsgruppene ved instituttet, der ein mellom anna skal rettleie doktorgradskandidatar.

Den som blir tilsett skal delta i undervisninga i samfunnsmedisin, miljømedisin og trygdemedisin. Det er spesielt ønskeleg at den som vert tilsett har praktisk erfaring frå kommunale samfunnsmedisinske oppgåver og kan legge til rette for praksisnær undervisning for studentane. Den som blir tilsett vil òg kunne bli pålagt å delta i instituttet si generelle undervisning, og i arbeid på instituttet elles.

Det vert lagt vekt på praktisk erfaring med kommunalt samfunnsmedisinsk arbeid. Vidare vil det verte lagt vekt på dokumentert vilje og evne til samarbeid både i undervisning, forsking, koordinering og rettleiing.

Undervisningsspråket er til vanleg norsk. Det blir kravd at den som blir tilsett kan undervise på norsk eller eit anna skandinavisk språk innan to år etter tilsetjinga. Den som blir tilsett må ha pedagogisk basisutdanning, men søkjarar som ikkje fyller dette kravet ved tilsetjing, får tilbod om opplæring og må dokumentere at utdanninga er fullført innan eit år etter dato for tilsetjing. Fristen er to år for den som ved tilsetjinga ikkje meistrar eit skandinavisk språk. Ein viser til dei generelle reglane ved universitetet om at innanfor si normale arbeidsplikt og faglege kompetanse kan den som blir tilsett også bli pålagt undervisning, rettleiing og eksamensarbeid utanfor den organisasjonseininga stillinga er knytt til. Universitetet i Bergen understrekar at pedagogiske kvalifikasjonar skal tilleggjast reell vekt ved tilsetjing i vitskaplege mellom- og toppstillingar. Søkjarane må dokumentere sine eigne pedagogiske kvalifikasjonar.

Dette kan ein til dømes gjere ved å sende inn:

• prov for gjennomført pedagogisk utdanning

• evalueringsrapportar av søkjaren si undervisning

• oversyn over undervisningsomfang og -nivå

• oversyn over hovudfags- og doktorgradsrettleiing og resultat

• mottekne studentprisar

• eigne pedagogiske publikasjonar

• eigne undervisningskompendium og undervisningsmateriell

• rapportar som syner deltaking i prosjekt knytt til utvikling av undervisning, så som alternative undervisningsformer, rettleiing eller læringsmiljø

Tilsetjinga går føre seg på grunnlag av vurdering av ei vitskapeleg nemnd samt ei sjølvstendig vurdering av tilsetjande organ inkludert intervju og eventuell prøving av undervisningskompetanse.

Søk på stillingen