Forskar i anvend og utrekningsorientert matematikk – utrekningsorientert mekanikk for oppsprukne porøse media (mellombels)
Søknadsfrist: 15.09.2020
Universitetet i Bergen
Universitetet i Bergen er ein anerkjend utdannings- og forskingsinstitusjon, organisert i sju fakultet og omlag 54 institutt og faglege senter. Campus ligg i sentrale delar av Bergen med universitetsområde på Nygårdshøyden, Haukeland, Marineholmen, Møllendalsveien og Årstad.
Gjennom eit sterkt og tett samspel med omverda - globalt, nasjonalt og lokalt - skal vi medverke til eit samfunn bygd på kunnskap, ferdigheiter og haldningar.
Vil du vere med å forme framtida?
Forskar
Ved Matematisk institutt er det ledig ei mellombels stilling som forskar i anvend og utrekningsorientert matematikk – porøse media frå 1. januar 2021. Stillinga er for ein åremålsperiode på 1 år, knytt til prosjektet “Thermo-Mechanical Subsurface Energy Storage (TheMSES)”, finansiert av «Toppforsk»-satsinga ved Noregs Forskingsråd.
Prosjektet fell inn under forskingsgruppa for porøse media, som omfattar omkring 30 personar, inkludert fast vitskaplege tilsatte, postdoktorar, ph.d- og masterstudentar.
Om prosjektet/arbeidsoppgåver:
Hovudmålet med TheMSES-prosjektet er å etablere matematiske modellar og numeriske metodar som vert kravd for å vurdere og utvikle energilagring under overflaten.
Forskerprosjektet knytt til denne utlysinga dreier seg om å forstå korleis sprekkar kan oppstå og opnast som følgje av endringar i strøyming og temperatur i grunnen når varme væsker vert pumpa ned under høgt trykk og seinare produsert. Denne utlysninga høyrer til Arbeidspakke 1, der hovudmålet er å utvikle matematiske modellar og tilhøyrande numeriske løysingsmetodar som kan bidra til å forstå korleis ulike prosessar i undergrunnen påverkar kvarandre . Det skal rettast særleg merksemd mot effektar av gjentatt lagring og produksjon i same formasjon. Utvikling av matematiske og numeriske modellar for å forstå korleis ulike mekanismar for opning og forplantning av sprekkar virkar saman, vil vere sentrale oppgåver i prosjektet.
TheMSES-prosjektet involverer samtlege fast tilsette i forskingsgruppa for porøse media ved instituttet, og har allereie rekrutttert fire ph.d studentar og ein postdoktor. Se http://themses.b.uib.no for ytterlegare informasjon.
Søkjarar må ha oppnådd norsk ph.d. – grad eller tilsvarande utdanning innanfor anvend og utrekningsorientert matematikk, eventuelt i fysikk, geovitskap eller tilsvarande, eller ha levert doktoravhandlinga si til vurdering innan søknadsfristen er ute. Det er ein føresetnad at doktorgraden er oppnådd før tilsetjing kan skje.
Solid bakgrunn i matematisk modellering, partielle differensiallikningar, numeriske metodar og numerisk simulering er ein føremon.
Erfaring med bruksområde innan bergmekanikk, elastisitet og eventuelt også strøyming i porøse media er ein føremon.
God evne til å arbeide sjølvstendig og strukturert og gode samarbeidsevner.
Flytande skriftlege og munnlege engelskkunnskapar.
Personlege og mellommenneskelege eigenskapar vil bli lagt vekt på. Forskingsrøynsle, ambisjonar og potensial vil også telje ved vurdering av kandidatane.
Vi kan tilby:
eit godt og faglig utfordrande arbeidsmiljø
løn etter lønssteg 59 (kode 1109/lønsramme 24, alternativ 3) i lønsregulativet til staten ved tilsetjing. Dette utgjer ei årsløn på kr 523 200,- brutto. Vidare opprykk skjer etter tenesteansiennitet i stillinga. For særleg kvalifiserte søkjarar kan det verte aktuelt å vurdere høgare løn.
Den statlege arbeidsstyrken skal i størst mogleg grad spegle mangfaldet i befolkninga. Personar med innvandrarbakgrunn og personar med nedsett funksjonsevne blir oppmoda om å søkje stillinga.
Vi oppmodar kvinner om å søkje. Dersom fleire søkjarar har tilnærma like kvalifikasjonar, gjeld reglane for moderat kjønnskvotering.
Universitetet i Bergen nyttar meirinnsyn ved tilsetjing i vitskaplege stillingar.
Opplysningar om søkjaren kan bli gjort offentlege sjølv om søkjaren har oppmoda om ikkje å bli ført på søkjarlista. Dersom oppmodinga ikkje blir teke til følgje, skal søkjaren varslast om dette.